الثلاثاء، 27 أبريل 2010

خلاص ,,, ماني متزوج ..1

ولدي الله يحفظه عمره 13سنه بس اسم الله عليه طويييل اطول مني عريض ومملوح ..
اخزي العين ماشاء الله لا ومطول شعره اللي يشوفه يقول عمره 15 سنه ,,

كنت اتمشى معاه في احد الجمعيات الكول ولا في بنتين صغار ما اقدر اعطيهم اكثر من 10 سنوات الحلويين قربوا من ولدي وماكان احد غيرنا موجودين في قسم الشبس وقاعد يناقشني اي نوع يبي وانا مندمجه اقوله حرام ماما يالله ضعفت جم كيلوا
نطت وحده منهم ولزقت بولدي جان تقول : واي شوفي يغازلني !! قطع شتبي لا طالعني مسيكين ولدي هد البطاط وقام يطالعها ..
عاد اهني استنسرت وصرت خوش ام ..
كشرت عن انيابي وقلت لها هيي انتي منوز اللي غازلج ماتستحين
ردت واي واي تنزف !!
قرديت وانا معصبه وفي الضحكه ولدي منخش وخايف ..
شوفي لاتقطين بلاويج علينا ترى والله اقدر اعرف منو انتي واطلع رقمج ورقم اهلج ..
وما ادري بعد شقلتلها طارت رفيجتها وطارت وراها ..
ماراح اناقش قضية البنات وشلون يقططون نفسهم على الصبيان .
ظليت ساكته طول الطريج ..
جان يقول ولدي يمه .. ليش سويتي بالبنت جذي !!
قلتله تبيها تبلشك ولا تبي تغازلها يعني ..
قالي لالالاء يمه يعني قصدي انتي غرتي منها ..
ليش كل الخالات تغار من حريم اولادهم ..
يعني انا لما اتزوج راح تسوين بزوجتي جذي ,, هذي انا ما اعرفها وبهدلتيها الله يعين زوجتي ..
طبعا انا حزتها كنت حدي تعبانه ويايتني اعصابي ولازم اصير خوش ام وخوش انسانه واللي اعلمه للناس من الصبر على المراهقين لازم اطبقه ..
ابتسمت ابتسامه صفراء تميل الى اللون الابيض
ورديت واكثر راح اسوي فيها .. تصبح بصطار وتمسي بصطار ..وغصبن عليها تطبع دوراتي وكتاباتي ومقالاتي وتنظم استشاراتي وتحنيني كل جمعه وكل مسا تسويلي مساج !!!!!
عصب من صجه لالا حرام عليج يمه ليش سوين فيها جذي ..
خلاص دامج امي ماراح اتزوج ...
وظلينا ساكتين وانا كاتمه ضحكتي عليه ..

ثاني يوم دخل من المدرسه حب راسي قالي يمه من صجج بتسوين بزوجتي جذي ضحكت جان يضحك قال اشوه خفت امس ...

هناك 16 تعليقًا:

  1. لوووووول من الحين محامي دفاع عن زوجته
    الله يخليه لج
    والبنات لا حول ولا قوة الا بالله
    للاسف العائق الأكبر يقع على اهلهم الي مخلينه جذي!
    بلا اخلاق ولا رادع ,


    ومااشاء الله عليج على راسي والله
    تربية مشرفة تدل على مثالية الأم ,

    ردحذف
  2. يا حلاته الله يحفظه لج و يرزقج بره ...

    و الله يعينج عليه لي جدام بس هالله هالله بالجنه السنعه و على قولة المثل لي بغيت اتضمها اسأل عن أمها نقي أهل سنعين و إن شاء الله اتوفقين ...

    بس صج صج يهبل ياحلاته و هو يحاتي ...

    ما شاء الله تبارك الرحمن ولا حولة ولا قوة إلا بالله

    ردحذف
  3. يحليله اسم الله عليه الله يحفظه
    اهم شي انه من الحين يحاتي زوجة المستقبل
    و زين سويتي بالبنات، ما ينعطون ويه، هذيلا و اهما صغار و جذي، الله يستر عليهم

    الله يخلي لج ولدج و تشوفينه معرس ان شاء الله

    ردحذف
  4. اسم الله عليه .. يا حلو قلبه اللي يخاف على زوجته من الحين :)

    عاد مو تغارين حزة الصجيه ههههههه

    عقبال ان شاءالله تفرحينا فيه :)

    ردحذف
  5. هههه

    الله يحفظه ويخليه لج ..

    أنا قريت العنوان وتالي قريت الموقف وتوقعت انه تعقد من موقف البنات ومايبي يتزوج بسبب هالأشكال ، طلعت السالفة غير لووول

    دمتي بخير يالخالة القشرة "خالتي قماشه" :))

    ردحذف
  6. ياحليله الله يحفظه ويبلغج فيه يارب..

    وعليه بلش يحاتي :)

    ردحذف
  7. انا الصراحه قريت كل كتاباتك
    ما اقول غير الله يحفظك ويخليك للاهلك واولادك ويشفيك من كل مرض يا رب ياكريم
    والله عورتي قلبي من قريت عن هذا المرض
    وان شاء الله اجر وعافيه
    واخيرآ وصلي سلامي الى ولدك وقولي له فبل لاتفكر بالزواج ابيك تكون احسن الناس والخ الله يخليه لك

    ردحذف
  8. ههههههههههههههههههه والله ضحكتيني...الله يخليه لج و يوم تفرحين بيه ان شاء الله :)

    ردحذف
  9. اثاري لج انياب ...:)
    واحنا نقرالج نقول مسالمه
    بس كلشي ولا الضنى تقبل الام الي محاربة على شانهم ولدج وايد حساس .. وعلاقتج وياه حلوه والله


    تقبل تحياتي . من زمان ما زرتيني :)
    فتحت مدونتة جديدة وودي تشرفينها :)

    ردحذف
  10. وايد ضحكة بصراحة الله يحفظه لك إن شاء الله

    أما عن البنات اللي مايستحون فوايييييييد للأسف :(

    أنا من العنوان عبالي تعقد من اللي شافه من البنات ولا طلعتي إنت السبب :)

    ردحذف
  11. كيف هي أخبارك أخية؟

    ارجو ان تطمنيني على نفسك :)

    دمت بود

    ردحذف
  12. يحليله انا عبالي بقول خلاص مابي اتزوج لما شاف جرأة البنات خخخخ

    الله يبلغج فيه ان شاء الله طبعا اول شي الشهادة لاحق عالزواج

    ردحذف
  13. السلام علييييييييييكم ;)
    والله والله والله والله دشيت ادور بلوقج وولهانه عليج

    وختي وزين اللي يأمن مستقبل مرته وياج :)))


    عسى الله يحفظه ويبلغج فيه معرس .. ويرزقه الزوجة الصالحة اللي من غير لاتطلبين منها تسوي لج مساج تسوي وقبل لا تطلبين منها الشي تسوي لج اياه :)

    ردحذف
  14. {مضان كريم

    وكل عام وانتم بخير :)

    ردحذف
  15. اشكر الجميع على تفاعلهم مع القصه وان شاء الله اكملها

    ردحذف
  16. ادعوكم لزياره الموقع التالي
    www.arabia-ms.com

    ردحذف