السلام عليكم .. صبحكم الله بالخير ...
اليوم اشاركم بتجربه رائعه من تجار بي الايجابيه وقبل ماتقرونها حابه اقولكم هالبوست مو للتعاطف معاي او مع احد من المصابين بالms مجرد تجربه امر فيها كل اسبوع حاولت اخليها اكثر سهوله ومتعه بعد .. فالتعليق يكون بعيد عن التعاطف ..
كنت قبل لااصاب بل ms انظر للمصاب عاادي بعضهم ينتكس ينكسر خاطري عليهم وادعولهم لكن اليوم دعوا من قلب خاصه وانا في البدايه .. يعني ربي لك الحمد ما اعاني مثل مايعانون ..
بسم الله ..
يوم الاحد يوم كان يمر علي عادي جدا .. مجرد اول يوم دوام وحوسة الاطفال والقعده من النوم والمسا كتتابة الواجبات وتقضي اغراض اىلمدرسه وطلبات المدرسات :(
الاحد هالسنه صار شيئ ثاني .. موعد ابرة ال avonex >>
يعني شنو .. اهي ابره ياخذها مريض ms مره في الاسبوع وهي نوع من انواع الابر مو للعلاج هالابره اهي فقط تاخر الاعراض او بالاصح تاخر الاعاقه وقت من الزمن والحمدلله انهم اكتشفوا شيئ ممكن يوقف هالمرض (:
كل الاحد الساعه 8ونص تقريبا اروح آخذ الابره .. طبعا تعور وتحر بس تعودت عليها تقريبا ..بالطريج حق المستشفى اخذ معاي ككاو ( نصيحه من صديقه ) عشان تخفف علي قزتها (؛
بعدها لازم اطلع مع صديقتي وبصراحه اهي اكثر من اخت خاصه وهي تتحمل مزاجي عقبها ومدت البوز على مايبرد مكان الابره
كل احد نتريق مطعم ونحاول ن نكتشف مطعم جديد .. ( راح اكتب بوست عن المطاعم اللي رحت لها واعجبتني )
وطبعا آكل اكل ماصاار ريوق وغدا مع بعض ..
عقبها نتسوق او نقضي شغلنا .. ارد البيت على الساعه 12 وتكون ااعراض الابره بدت
اعراض الابره :
مثل اعرض الافلونزا ..( الم بالعظام تكسر ,سخونه , دوخه , رعشه ورجفه , وصداع , واخرها بجي !!)
طبعا الازم الاستغفار خاصه الم لعظام والرعشه .
اخذ مسكن وانام والحمدلله اليهال قاموا يعارفون هالشي ماحد يقعدني (:
اقوم قبل المغرب اصلي العصر وتبدي السخونه اكثر من الظهر خاصه ان جسمي تعود على المسكن
ربي لك الحمد الواحد مو حاصله كل هالاجر وربي مايجمع على المؤمن حرين (قريته عن احد العلماء فاذا اصاب بالحمى خفف عنه نار جهنم او لم تصيبه )
الشيئ الحللللللوووووو ان في من صديقاتي اثنين يجيبون لي كل الاحد برد هالحزه ..طبعا اللي صاير غرامي ..pinkbarry وcold ston ماقصرواا صج صار لهم اسبوعين كاشتين فيني بس عذرهم معاهم .. اخدم نفسك بنفسك ..
احب الرومان من pinkbarry جربت الشاي الاخضر جنه حنه :( والثاني روب مع شكر ..
اقعد بفراشي اكل البرد واستمتع فيه والكمادات فوق راسي وعلى رقبتي وبريولي وعيالي معاي بالفراش ادرسهم .. ساعات ياذن المغرب وما اقدر اقوم اصلي فربي لك الحمد على رخصة الجمع ,
احب هالنوع من الكمادات اخذتهم من دايسوا اذاتبونهم باردين حطوهم بالفريزر او حارين بالمكرويف دقيقه .
عقب تخف االاعراض الحمد لله ويبقى التكسر .. يتعشون اليهال وينامون
احاول اقوم واخذ شور بارد عشان اصحصح ..
في اشياء صغيره يقومون فيها اللي حوالي احبها واقدرها منهم وافقدها ..
اختي اللي ااصغر مني كل ساعه تتصل تسال شلون صرت او سااعات اشوفها في بيتي وتحديدا عند فراشي .. امي زيارتها لي بليل متاخر وساعات العصر تضف اليهال وتنومهم شيء كبير عندي وايد
وابوي زيارتها ورقيته علي ومسحته على راسي شيئ
صديقاتي ماتوقف مسجاتهم شلون صرتي لي انام واصبح ثاني يوم حتى من بره السعوديه والامارات يسالون ..
صديقتي علمتني او من تجربتها ك دكتوره بكيمياء الصيدله ان ماء زمزم يسرع من مفعول الادويه وفعلا جربت هالشيئ بركة ماي زمزم عجيبه ..
اذاا ماعندي احد مجهزتلي افلام اشوفها اخر واحد motherhood اكسرت خاطري وايد في امهات مثلها او اعرفهم بالاخص :(
يخلص اليوووم وصج ما اخلي وردي لازم اقرأ وردي قبل لااشوف الفيلم حتى لو صفحتين والرقيه الشرعيه ..
ساعات تييني حالة بجي بس على ولا شيئ والحمدلله ان الطبيب قالي من الابره مو شرط تصيب كل واحد ومو شرط كل مره يعني مره بالشهر تييني هالحاله وتعدي ..
هذا جدولي يوم الاحد قمت استمتع فيه وايد ... ومن كان له حيلة فليحتال
وربي يتمم علينا وعليكم الصحه واالعافيه
